تبلیغات
◄███▓▒░░ -[ Xatirələr durağı ]- ░░▒▓███► - ژاپونلو یازیچی هاروکی موراکامی

خاطیره‌لر دوراغی (حیکایه‌لر)، حسین واحدی‌نین اؤزل بلوقو Hüseyn vahidi-nin özəl bloqu - Hekayələr

ژاپونلو یازیچی هاروکی موراکامی

یازار yazar :admin
تاریخ:1394/07/22-11:58

ژاپونلو یازیچی هاروکی موراکامی

Yaponiyalı yazıçı Haruki Murakami

حاضیرلایان: حسین واحدی

hazırlayan: Hüseyn Vahidi


هاروکی موراکامی* 1949-جو ایلده ژانویه آیینین 12سینده کییوتو شهرینده دونیایا گلمیشدیر. آتاسی بوت‌پرست کئشیش، آناسی ایسه ادبیات معلمی اولان هاروکی هله گنج یاشلاریندان‌ بَری ادبیاتا مئیل گؤسترمیشدیر. اوشاقلیق دؤنه‌مینی اؤز اثرلرینده تئز-تئز عکس ائتدیرن یازیچی بیر چوخ مصاحبه‌لرینده اوشاقلیقدا آتا-آناسیندان اؤیره‌ندیگی گئرچکلرین اونون اوچون وازکئچیلمز اولدوغونو آچیقلامیشدیر. گنج هاروکی گنجلیگی‌نین بؤیوک بیر بؤلومونو کوبئ [kobe] شهرینده کئچیرمیشدیر. توکییونون واسئدا بیلیم‌یوردونون ادبیات فاکولته‌سینی بیتیرمیش یازیچی بیلیم‌یوردو ایللرینده اوسلوبیاتین [سبک‌تانیمانین] دَرین سیرلرینی اؤیرنمیش، چئشیدلی دوغما و خارجی اثرلردن رنگارنگ تصورات‌لار آلمیشدیر. یازیچی گنج یاشلاریندان‌ کیتاب‌لارا، اؤزللیکله ده باتی [غرب] ادبیاتینا خصوصی مئیل گؤسترمیشدیر.

 

بیر چوخ اثرلرینده بو ماراغی دقت مرکزینه چئویرمیش یازیچی، اؤیرنچی اولارکن ترومان کاپوتئ [Truman Kapote]، کورت وونئقوت [Kurt Vonequt]، فرانس کافکا [Frans Kafka]، کئنزابورو اوئ [Kenzaburo Oe]، یاسوناری کاواباتا [Yasunari Kavabata] کیمی داهی‌لرین اثرلرینه داها چوخ علاقه گوسترمیشدیر. طالعین یول‌لاریندا نجات اومیدی ایله یاشایان موراکامی اثرلری‌نین قهرمان‌لاری سانکی داییمی آختاریشدا‌دیرلار. ایلک باخیش‌دان مختلف کیتاب‌لارداکی قهرمان‌لاری سانکی هر هانسیسا ائینیت، اورتاق مقصد آختاریشی بیرلشدیریرمیش کیمی تصورات یارا‌دیرلار. فلسفه-پیسکولوژی ژانرینین بانی‌لرین‌دن ساییلان هاروکی موراکامی 20-جی عصر ادبیاتیندا اؤزونو دوغرولتماغی تام آنلامیندا باجارمیشدیر. هاروکی موراکامی دونیانین باشاباشیندا بیر چوخ اوغورلارا ایمضا آتا‌راق چاغداش ادبیاتا حاضیردا دا اؤز پای‌لارینی وئرمکده‌دیر. ایلک اؤدولونو قونزو ژورنالیندان آلمیش یازیچی سونرا‌دان دونیا مقیاسیندا بیر چوخ اؤدوللر قازانیبدیر.

ایلک اثری اولان "پینبول-1973" 1985-جی ایلده ایشیق اوزو گؤرموش و موراکامی‌نین ویزیت کارتی اولا‌راق معاصر ادبیات چئوره‌سینده یازیچی‌نین آدینی تاریخه یازمیشدیر. موراکامی‌نین ائلئمئنتار [ابتدایی] اشیا و حادثه‌لردن دَرین فلسفی معنا چیخارماسی اونون دونیادا مشهور اولماسینین سبب‌لرین‌دن بیریدیر. ماراق‌لی‌دیر، یازیچی "پینبول-1973" اثرینی 29 یاشیندا ایکن بئیسبول مسابقه‌سینی ایزله‌یَرکن یازماغا قرار وئریب. کیچیک حجم‌لی اثرلرین‌دن ساییلان "تونی تاکیتانی" اثرینی ایسه یازیچی حیات یولداشی ایله هاوایی آدا‌لارینی گزرکن بیر دو‌لارا آلدیغی، اوستونده بؤیوک "تونی" یازی‌سی اولان سئویم‌لی کؤینه‌یی و ایکینجی دونیا ساواشی دؤنه‌مینده یاشامیش موسیقی‌چی شیزابورو تاکیتانی‌نین حیات یولوندان ایلهاملانا‌راق عرصه‌یه گتیرمیش‌دیر. ایلک باخیش‌دان اویغونسوزلوق تشکیل ائدن ایکی مفهوم، دیگر طرف‌دن ایسه عرصه‌یه گلمیش گؤزل اثر.

هاروکی موراکامی‌نین بیر چوخ اثرلرینده سوررئالیست ایده‌لرین حؤکم سوردوگو آیدین گؤرونور. بیر چوخ مصاحبه‌لرینده یازیچی بیلدیریر، حتی بعضاً اثرلری‌نین اییمسر [خوش‌بین] و یا کوسکون [بدبین] سونلوقلا بیتمیش اولماسینا قرار وئره بیلمیر. یازیچی‌نین فیکرینه گؤره هر کس ایسته‌دیگی، گؤردویو فورم‌دا رئال‌لیغی اونون اثرلرینده تاپمیش اولا بیلر. موراکامی قئید ائدیر، بیر چوخ حال‌لاردا یازماغا باشلایارکن، اثرین مؤوضوسونو بئله اوّلجه‌دن قرارلاشدیرمیر و یا بیر مؤوضودا یازارکن قلمی اونو تاماماً باشقا یؤنه [جهته] یؤنلدیر.

یازیچی‌نین "نوروئژ مئشه‌سی" اثرینده، موراکامی‌نین حیات یولو، خصوصیله ده اؤیرنچی‌لیک دؤنمی غیابی اولا‌راق تصویر اولونور. بو دؤنمده یازیچی‌نین کئچیردیگی حس‌لر، یاشادیغی حاقسیزلیق‌لار، جمعیتین أیری-أکسیک‌لیک‌لری آچیق-آیدین گؤستریلیر. تصادفی دئییل، موراکامی‌یه أن بؤیوک شؤهرتی ده ائله محض بو اثر گتیرمیشدیر. بوندان باشقا موراکامی‌نین گؤزل موسیقی و آشچی [آشپاز] بیلیجی‌سی اولماسینی دا خصوصی قئید ائتمک مقصده اویغون اولاردی. بئله اثرلرینده اونون خصوصی یئمک رئسئپتلری [دستورالعمل-لری] قهرمان‌لارین دیلین‌دن بیر چوخ حال‌لاردا تقدیم اولونور. بو دا اؤز نؤوبه‌سینده موراکامی‌نین اوزون مدت جاز-بار [Jazz-Bar] صاحبی اولا‌راق خانیمی یوکو ایله بیرلیکده کئچیردیگی دؤنمین نتیجه‌سی کیمی اؤزونو بروزه وئریر.

موراکامی‌نین اثرلرینی اوخویارکن اوخوجو، معاصر و کلاسیک موسیقی، تاریخ، فلسفه، جوغرافیا، معاصر اینجه‌صنعت نؤو‌لری و دیگر ساحه‌لرده بیلیک‌لرینی، دونیاگؤروشونو گئنیشلندیرمیش اولور. "کافکا ساحلده" اثرینده موراکامی‌نین بؤیوک موسیقی وورغونو اولماسی آیدین گؤرونور. عمومیتله قئید ائتمک اولار، یازیچی‌نین اکثریت تشکیل ائدن اثرلرینده، خصوصیله ده "کَسه‌ین" تریلوژیسینه [اوچ بؤلوملو رومان] داخیل اولان اثرلری‌نین قهرمان‌لاری موسیقی و کیتاب آشیقی‌دیرلر. بو دا اؤز نؤوبه‌سینده یازیچنین قهرمان‌لارینا وئردیگی بعضی شخصی خصوصیت‌لرین‌دن خبر وئریر. "اثرلریمده هر کس ایسته‌دیگینی تاپا بیلر" دئیه یازیچی چوخ واخت اوخوجولارینا مراجعت ائدیر. اونون اثرلری‌نین معنا درین‌لیگینه قرق اولدوقجا بونون حقیقتن ده بئله اولدوغو آیدین بل‌لی اولور. یازیچی بیر چوخ حال‌لاردا ایکینجی دونیا محاربه‌سی‌نین ماهر بیلیجی‌سی کیمی ده تانینیر و بونو دا اؤز اثرلرینده مهارتله قئید ائتمه‌یی باجاریر.

حاضیردا هاروکی موراکامی آمریکاین بیر چوخ اعتبارلی بیلیم‌یورد‌لاریندا نطق‌لرله چیخیش ائدیر و دونیا اوخوجولارینا اؤز تؤهفه‌لرینی وئرمکده داوام ائدیر. موراکامی‌نین اثرلری دونیانین 30-دان چوخ دیلینه ترجومه اولونوب. دونیا مقیاسیندا میلیون‌لارلا اوخوجونون قلبینه یول سالمیش، داخیلی عالمی ایله داییم باریشیقدا اولان یازیچی هئچ واخت شؤهرت آرزوسوندا اولمادیغینی هر زامان بیلدیرمیشدیر. حتی مصاحبه‌لری‌نین بیرینده، موخبیرین "ان بؤیوک باشارینیز نه‌دیر؟" سوالینا قیسا اولا‌راق "منیم سئویملی پیشیگیم، وفالی قادینیم و گؤزل اثرلر یاراتماق یئته‌نه‌ییم وار" دئیه جاواب وئرمیش‌دیر.


آچیقلاما:

* هاروکی موراکامی [Haruki Murakami] چاغداش ژاپون یازیچی‌سی و ترجومه‌چی‌سی




بنزر یازیلار: Haruki Murakami 

گؤندر - کلوب‌دات‌کام
باخیشلار() 
Elnaz
1394/08/14 22:22
سالامملار
یورولمویاسیز.
موراکامینین ترک و با فارس دیلینه چئورلمیش اثرلری وار؟
جاواب admin : سلاملار
تورکجه‌یه چئوریلمیش کیتابی اولماییب (ایراندا)، آما ثالث انتشاراتیندا بیر نئچه فارسجا کیتابی واردیر.
پاشا
1394/07/22 18:59
سالاملار و سایغیلار سایین بئی جینابلاری
چوخ گؤزل
اللرینه ساغلیق
جاواب admin : سلاملار
ده‌یر وئردییینیز اوچون تشککور ائدیرم.
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.


Related Posts Plugin for WordPress, Blogger...