تبلیغات
◄███▓▒░░ -[ Xatirələr durağı ]- ░░▒▓███► - بیر ساعاتین حیکایه‌سی Bir saatın hekayəsi

خاطیره‌لر دوراغی (حیکایه‌لر)، حسین واحدی‌نین اؤزل بلوقو Hüseyn vahidi-nin özəl bloqu - Hekayələr

بیر ساعاتین حیکایه‌سی Bir saatın hekayəsi

یازار yazar :admin
تاریخ:1394/02/17-20:39

بیر ساعاتین حیکایه‌سی 

یازار: کئیت شوپین*

کؤچورن: حسین واحدی


خانیم ماللاردین اورک آغری‌سین‌دان اذیت چکدیگینی اوزون زامان ایدی بیلیردیک. بونا گؤره ده، ألیمیزدن گلنی ائدیردیک، حیات یولداشی‌نین اؤلوم خبرینی اونا اولدوغو قدر داها یومشاق شکیلده چاتدیراق.

اونون باجی‌سی ژوسئفین قیریق جمله‌لرله اولان‌لاری ناغیل ائتدی؛ بوتون مسئله آیدین اولدو. اونون حیات یولداشی‌نین دوستو ریچارد دا بورادا، اونون یانیندا ایدی. او، برئنتلی ماللاردین دا آدی‌نین “اؤلن‌لرین” سیاهی‌سیندا قئید اولوندوغو دمیریول قضاسی ایله باغلی خبر لیستی اولاندا اورادا ایدی. آنجاق بو خبری تصدیق ائتمک اوچون ایکینجی تئلئقرامی گؤزله‌دی و سس‌سیزجه بو آجییا دؤزه‌رک، بونو هامی‌دان قاباق خبر وئرمک اوچون تَلَسدی.

خانیم ماللارد هئچ جور ائشیتدیک‌لرینه اینانماق ایسته‌میردی، ائله بونا گؤره ده عینیله بو حیکایه‌نی ائشیتمیش بیر چوخ قادین کیمی اولان‌لاری سونادک دینلمه‌دی. قفیل‌دن وحشی کیمی اؤزونو باجی‌سی‌نین قول‌لارینا آتدی و هؤنکورتو ایله آغلاماغا باشلادی. کدر [غم] قاسیرغاسی [طوفانی] ساکت‌لشندن سونرا او، تکجه اؤز اوتاغینا چکیلدی. آرتیق اونا دایاق اولا‌جاق بیری یوخ ایدی.

بورادا آچیق پنجره ایله اوزبه‌وز راحات، گئنیش بیر اوتوراجاق [صندلی] وار ایدی. او، ایلیگینه‌دک ایشله‌میش، حتی روحونو بئله اؤز آغوشونا آلمیش یورغونلوق‌دان اؤزونو اوتوراجاغا آتدی.

ائوی‌نین اؤنون‌دکی آچیق ساحه‌ده یازین گه‌لیشی ایله جانلانان آغاج‌لارین سئوینج‌دن او یان، بو یانا نئجه أسدیگینه تاماشا ائدیردی. هاوا‌دان یاغیشین خوش عطری گلیردی. کوچه‌نین آشاغی‌سیندا قانونسوز یوللا نارکوتیک [مخدر مواد] ساتان کیشی قیشقیرا‌راق اؤزونه مشتری آختاریردی. اوزاق‌دان ضعیف نغمه سسی ائشیدیلیر، سایسیز-حساب‌سیز سئرچه‌لر ائوین دامیندا جیککیلده‌شیردی.

ماوی سمانین باتی‌سیندا، پنجره ایله اوزبه‌وز یاری قالاقلانمیش توپا بولودلار گؤزه ده‌ییردی.

او، باشینی اوتوراجاغین سؤیکنجه‌یینه سؤیکه‌ییب دینمزجه اوتوردو و یالنیز قهر اونون بوغوب سیلکه‌له‌ینده اوشاق کیمی هؤنکورمه‌یه باشلادی.

او، آغ‌بنیز، ساکت چؤهره‌سی ایله اوزونون هر جیزگی‌سی عذاب و داخلی گوجدن خبر وئرن گنج بیر قادین ایدی. آنجاق ایندی اونون سما‌داکی قالاق‌لارا زیللنمیش گؤزلرینده معنا‌سیز باخیش‌لار سئزیلیردی. و آرتیق بو بیر جوت گؤز دالغین باخیش‌لاردان داها چوخ، درین خیال‌لاری تجسم ائتدیریردی.

سانکی نسه اونون صبرسیزلیکله گؤزلدیگی بیر شئی اونا طرف یاخین‌لاشیردی. نه ایدی او؟ او بیلمیردی؛ بونو هئچ سؤزله ده ایفاده ائتمک اولمازدی. آما او، بو گؤزگؤرونمزین سما‌دان سورونه-سورونه هاوایا هوپموش سس‌دن، قوخودان، بویا‌لاردان کئچه‌رک اونا ساری گلدیگینی حس ائدیردی.

آرتیق هیجان‌دان اونون اوره‌یی آغزینا گلمیشدی. آرتیق یاواش-یاواش اونو اؤز آغوشونا آلماغا حاضرلاشان وارلیغی تانیماغا باشلاییردی و باجاردیغی قدر آغاپپاق، ظریف اللری ایله اونو یولون‌دان دؤندرمه‌یه جان آتیردی.

او بیر آز ساکت‌لشمیشدی، یاری آچیلمیش دوداقلاریندان‌ پیچیلتی‌لی کلمه‌لر ائشیدیلدی. او ائله هئی پیچیلتی ایله خلوت‌جه بو سؤزلری تکرار ائله‌ییردی: “آزادام، آزاد، آزاد!” اونون گؤزلرینه حاکم کسیلمیش معنا‌سیز و قورخو دولو باخیش‌لار سانکی یوخا چیخمیشدی. اونلار گؤی‌دن بیر جوت اولدوز کیمی پاریلداییردی. آرتیق نبضی تئز-تئز ووروردو، دامارین‌داکی قان بدنی‌نین هر نقطه‌سینی قیزیشدیریب ألدن سالمیشدی.

او، تپه‌دن دیرناغاجان بوتون بدنینی ساران بو نشه‌نین نه اولدوغونو آنلایا بیلمیردی. نه ایسه چوخ آیدین و قیزغین بیر دویغو اونا بو لازم‌سیز تکلیفی رد ائتمه‌یه امکان وئرمیردی.

او امین ایدی، بیلیردی، او ایستی، مهربان اللری بوزوشموش، بوتون بو ایللر ایچینده اونا یالنیز سئوگیله باخمیش او گؤزلری ایندی بوز، معنا‌سیز و اؤلو گؤرسه، اؤزونو ساخلایا بیلمه‌ییب یئنی‌دن هؤنکورتو ایله آغلایا‌جاق. آنجاق او، بوتون بو آجییا باخمایا‌راق، دیگر طرف‌دن ده دوشونوردو، آرتیق قارشی‌دان گلن اوزون ایللر یالنیز و یالنیز تک اونا اؤزل [مخصوص] اولا‌جاق. و قادین، آیاغینادک گلمیش بو قوناغی سلاملاماق اوچون قول‌لارینی آچیب اونا ساری اوزاتدی.

آرتیق بوندان سونرا هئچ کیم اوچون یوخ، فقط اؤزو اوچون یاشایا‌جاقدی. آرتیق هئچ بیر گوج اونو کیشی و قادین‌لارین بیر-بیرینه اؤز شخصی ایستک‌لرینی یئریتمک حاق‌لاری‌نین اولماسی ایله باغلی ایچدن گلن شکیلده یارانمیش اینانج‌لارا اینانماغا مجبور ائده بیلمزدی. ایستر یاخشی، ایسترسه ده پیس نیتلی اولسون، فرقی یوخدور، هئچ بیر شئی داها اونون قلبینده قوردوغو کیچیک محکمه‌ده بو جینایته هئچ جوره برات قازاندیرا بیلمزدی.

آنجاق بوتون بون‌لارا باخمایا‌راق، اونو نه واختسا سئومیشدی. بلکه ده یوخ… نه فرقی وار آخی! او آرتیق آزادلیغی، آچیلمامیش بیر سیررین نَیه لایق اولدوغونو اؤزونه اینام حسی‌نین صاحب‌لیگینه رغماً اؤز وارلیغی‌نین أن گوجلو ایتکی‌سی کیمی هر شئی‌دن اوستون توتوردو.

آزادام! تپه‌دن دیرناغاجان آزادام!”، او ائله هئی پیچیلداییردی.

جوزئفین ایسه دیزی اوسته باغلی قاپی‌نین آرخاسیندا آغزینی قاپی‌نین آچار یئرینه توتوب، ایچَری گیرمک اوچون یالواریردی. “لویزا، قاپینی آچ! یالواریرام، آچ قاپینی- اؤزونو خسته ائده‌جکسن . سن نئینیرسن، لویزا؟ آللاه خاطرینه آچ قاپینی.”

رد اول. هئچ نه ائتمیرم.” آما یوخ، او آچیق پنجره‌دن حیات جؤوهری ایله دولموش هاوانی ایچینه چکیردی.

بو گون‌لرده اونون خیال‌لاری هئچ سؤزونه باخمیردی. آرتیق یاز، یای، بیر سؤزله بوتون گونلر یالنیز اونا مخصوص اولا‌جاق. او تئز دعا ائتدی، آللاه اونا عؤمور وئرسین. یالنیز دونن اوزون عؤمور باره‌ده دوشوننده جانین‌دان بیر اوشوتمه کئچمیشدی.

و، سونوندا، او، باجی‌سی‌نین تأکیدی ایله قالخیب قاپینی آچدی. اونون گؤزلرینده سانکی بیر ظفر قیغیلجیمی آلوولانیردی و اؤزو ده بیلمه‌دن سانکی قلبه ایلاهه‌سی کیمی آمیرانه شکیلده آددیملاییردی. باجی‌سی‌نین بئلین‌دن توتدو و اونلار بیرلیکده پیلله‌لری آشاغی دوشدولر. ریچارد آشاغیدا اونلاری گؤزله‌ییردی.

ائله بو زامان کیمسه باییردا داروازانی آچیردی. چاغیریلمامیش قوناق ألینده چاما‌دانی و چتیر ایله سیاحت‌ین یورغونلوغو هله جانین‌دان چیخمایان برئنت‌لی ماللارد ایدی. او، نه‌اینکی قضا یئرین‌دن چوخ اوزاق اولوب، حتی، اورادا کیمینسه اولماغین‌دان خبری ده اولماییب. او، ایچری گیرنده جوزئفی‌نین نئجه هایقیرتی قوپارماسینی و أن یاخین دوستو ریچاردین هر وجدله اونو حیات یولداشین‌دان گیزلتدیگینی گؤرنده یئرینده دونوب قالدی.

آنجاق ریچارد چوخ گئجیکمیشدی.

دوکتورلار گلنده بللی اولدو، اونون سئوینج‌دن اوره‌یی پارتلایا‌راق اؤلوب.

 

چئویرن: تامئللا آبدییئوا

 

آچیقلاما:

*‌ کئیت شوپین/ - Kate Chopinآمئریکالی رومان و قیساحیکایه یازان

یازی تورو : اؤیكو (حیكایه) 

گؤندر - کلوب‌دات‌کام
باخیشلار() 
خزراوغلو
1394/02/26 12:44
بو بایرام سیزه‌ و بوتون موسلمانلار اوچون قوتلو اولسون
یوز ایل‌لر متلولوقلا یاشایین.
جاواب admin : سلاملار. سیزه ده مبارک اولسون حؤرمتلی یولداش.
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.


Related Posts Plugin for WordPress, Blogger...