تبلیغات
◄███▓▒░░ -[ Xatirələr durağı ]- ░░▒▓███► - مضحکه

خاطیره‌لر دوراغی (حیکایه‌لر)، حسین واحدی‌نین اؤزل بلوقو Hüseyn vahidi-nin özəl bloqu - Hekayələr

مضحکه

یازار yazar :admin
تاریخ:1394/02/5-20:04

مضحکه

یازار: اوزئییر حاجی‌بَی‌لی

کؤچورن: حسین واحدی


کندلی‌نین بیری بوغداسینی، باراماسینی آپاریب بازاردا ده‌یر-ده‌یمزینه ساتیب بیر دنه آت، بیر دنه ائششک و أینینه ده بیر دست پالتار آلیب، ائوینه طرف گئدیردی....

بیر نفر بَی بونو گئندن گؤردو و تعجب ائله‌دی کی، کندلی‌نین هم آتی وار، هم ده ائششه‌یی. دال‌دان کندلی‌یه یاخینلاشیب باشینا ائله بیر قاپاز سالدی کی، کندلی آنجاق بیر ساعات‌دان سونرا آییلا بیلدی و آییلان‌دان سونرا دا باخیب گؤردو کی، ائششک یوخدور.

یاساوول* کندلی‌نین آتینا باخیب شکایت‌ینه قولاق آسدی، آما شکایت "حاققی" آز اولدوغونا گؤره، کندلی‌یه بیر نئچه دنه قامچی چکدی و دئدی:

 - باغلا آتینی بورادا، گئت اطرافی گز، بلکه ائششه‌یین تاپیلا.

کندلی آتینی یاساوولا تاپشیریب، ائششه‌یی آختارماغا گئتدی. چوخ گزدی، چوخ دولاندی، هرچند بَی‌ین قاپی‌سیندا بیر ائششک گؤردو کی، اؤز ائششه‌یینه چوخ اوخشاییردی، آما او جوره شئیلری فیکرینه گتیرمیه جرأت ائلمه‌دی.

و قاییتدی کی، بلکه یاساوول بیر کؤمک ائلیه، آما نه یاساوول‌دان و نه آتدان بیر نیشان دا گؤرمه‌دی.

کندلی خوفا دوشدو، ائله بیلدی کی، بون‌لار هامی‌سی یوخودور. اونون اوچون اؤزونو چیمدیکله‌دی کی، آییلسین، آما گؤردو کی، خئیر، یاتماییب‌دیر.

بیکئف و بیداماق بیر چایین قیراغیندا اوتوروب ائوینه قاییتماغا اوتانیردی. گؤردو کی، بیر نفر ساریق‌لی گلیر. کندلی دوروب ایکی‌قات أییلدی و یئنه بیداماق یئرینه اوتوردو. ساریق‌لی دئدی:

- نه‌دیر کی، بئله بیداماقسان؟

کندلی آغلایا-آغلایا احوالاتی نقل ائله‌دی.

ساریق‌لی بونون تزه لیباسینا دقت یئتیریب دئدی:

-  من سنه علاج ائدرم.

یازیق کندلی شادلیغین‌دان بیلمه‌دی کی، نه قاییرسین، اؤزونو ییخدی ساریق‌لی‌نین آیاغینا. ساریق‌لی دئدی:

-  سنین آتینی دا، ائششه‌یینی ده جین اوغورلاییب‌دیر و جین ده سنین بو لیباسیندا‌دیر. اونا گؤره بو لیباسی اووسونلاماق لازیم‌دیر. و ایللا باشینا چوخ بلا‌لار گلر.

کندلی جین آدینی ائشیدن کیمی دلی‌تک پالتارینی چیخاردیب توللادی. ساریق‌لی بیر دعا اوخودو و دئدی:

-  بیر قدر یات.

اونسوز دا ایت کیمی یورولموش کندلی باشینی یئره قویان کیمی یوخو باسدی و یوخوسوندا گؤردو کی، ائششه‌یی ده، آتی دا تاپیلیب، کیشنه‌یه-کیشنه‌یه بونون یانینا چاپیرلار. کندلی سئویندیگیندن ائله چیغیردی کی، اؤز سسینه اویاندی و اویانیب گؤردو کی، نه ساریق‌لی وار، نه پالتار.

بینوانی دهشت باسدی. الینه بیر چوماق آلیب اؤزونو قورویا-قورویا کندینه یئتیردی. خالق ییغیلیب دئدیلر کی، آ کیشی، دلی اولوبسان نه‌دیر؟ لوت گزیب اؤزونو قورویورسان؟

دئدی:

-  آتیمی اوغورلادی‌لار، ائششه‌ییمی اوغورلادی‌لار و پالتارلاریمی اوغورلادی‌لار. ایندی قورخورام کی، اؤزومو ده اوغورلایا‌لار.

* قدیم زامانلار شاهلار اولان یئرلرده قایدا-قانون یارادانلارا دئیرمیشلر

یازی تورو : اؤیكو (حیكایه) 

گؤندر - کلوب‌دات‌کام
باخیشلار() 
حامد مرسلی
1394/02/5 23:07
چوخ آنلاملی و گؤزل؛ أمه‌یینه ساغلیق قارداش
جاواب admin : سلاملار. یاشا عزیز حامد بی.
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.


Related Posts Plugin for WordPress, Blogger...