تبلیغات
◄███▓▒░░ -[ Xatirələr durağı ]- ░░▒▓███► - یئنی امکداش/حیکایه Yeni əməkdaş

خاطیره‌لر دوراغی (حیکایه‌لر)، حسین واحدی‌نین اؤزل بلوقو Hüseyn vahidi-nin özəl bloqu - Hekayələr

یئنی امکداش/حیکایه Yeni əməkdaş

یازار yazar :admin
تاریخ:1393/11/27-18:22

یئنی امکداش

یازار: حسین واحدی



اورمیه‌نین لاستیک فابریکاسینین آمبار بؤلومونده چالیشان 43 یاشلی جاوادین داخلی تئلفونو زنگ چالماغا باشلادی. جاواد بیلگی‌سایاردان ال چکیب دسته‌یی گؤتوروب اینجه سس‌له دئدی:

«آلو، سالام بویورون»

خط دالیندا عصب‌لی سسله‌ دئییلدی:

«علیک! تئز تئلفونو  وئر جاوادا ایشیم وار»

«آغا جاواد بورادا دئییل»

«هارا گئتدی»

«گئدیب حاماما، یووونا اولا شاماما»

«سن کیمسن؟»

«من رجبم، آمبارین یئنی ایشچی‌سی... آلو...»

اصغر آمبارین تئلفونون کسیب اؤز- اؤزو ایله دانیشماغا باشلادی:

«کؤپئی اوغلو تازا گلیب هله منی اله سالیر، بیز تازا گلنده نئچه آیا کیمین دانیشمازدیق»

جاواد ایسه تئز، ایداری بؤلومونه زنگ ائدیب اوراداکی علی-یه هرنه‌یی آچیقلادی. آمباردا اولان هرکسه ده تاپیشیردی اصغر بورا گلسه اونو آزدیرالار.

چوخ چکمه‌دی اصغر قا-قاباق اوتاغیندان ائشیگه چیخدی. چایچی حبیب ساللانا-‌ساللانا ایکینجی قات‌دان آشاغی دوشوردو. استکان‌لار مجمعه اوستونده حبیب‌ین آیاقلارینین یئره سورتولمه سسی ایله یاللی گئدیردیلر.

اصغر اونا ساری گئدیب دئدی:

«هله بیلیرسن آمبارا بیر تربیه‌سیز ایشچی گلیب؟ آدی ‌دا رجب‌دی»

حبیب هرنه دن خبرسیز اصغرین اوزونه باخیب دئدی:

«یووووو... دئ بیر من اؤلوم!»

اصغردن جاواب چیخماسادا حبیب سیرتالا-سیرتالا دئدی:

«گلسین دا تعجب یئری یوخدور کی. پارتین اولسا هر یئرده چالیشا بیلیرسن، بیرگون گؤررسن چایچی حبیب اولوب مودور»

سونرا اصغرین جاواب وئرمه‌سینه ماجال وئرمه‌ییب اوتاقلارین بیرینه سوزدو.

اصغر باشینی توولاییب، پیلله‌لردن یوخاری چیخماق ایسته‌ینده، ایداری بؤلومونون سوروملوسو یاشاری گؤردو، قاباغا گئدیب، سول الینی سینه‌سی اوسته قویوب، أییلیب دئدی:

«سالام آ رئیس... گؤرورسوز شرکت نه گونه قالیب؟»

یاشار سایار- سایماز جاواب وئردی:

«نه اولوب یئنه اصغر؟»

اصغر یالتاق سسله دئدی:

«واللاه نه اولاجاق! ائله‌بیل بیر تازا ایشچی گتیریب‌سیز آمبارا... آدی دا رجب دی»

«کی نه اولا؟»

«هئچ. بیرآز بوندان قاباق من زنگ ائتدیم آمبارا، دسته‌یی او گؤتوردو، سلام-علیک یئرینه، منی اله سالدی. اوتانمازین بیری»

ایداری بؤلومونون سوروملوسو یاشار، قارنینی بیرآزدا قاباغا وئریب ساغ الینی جئبینه قویوب دئدی:

«جاوان دی دوزه‌لر... گئت گؤر نجور آدام دی دا؟»

سونرا بیغ آلتی گوله‌رک اصغردن آیریلدی.

آمباردا وضعیت فرقلی اولاراق، جاواد هامینی اؤز دؤوره‌سینه ییغیب اصغرین زنگین‌دن دانیشیب قاهقاها ایله گولوردولر.

اصغر ایداری بینادان حیطه چیخیب سککی‌ده دایاندی. پیلله‌لرین آشاغی‌سیندا هادی، کاظم و ابراهیم مهندس‌لیک دایره‌سینین ایشچی‌لری بیر قیراق‌دا دایانیب دامجی-دامجی یاغان یاغیشین آلتیندا سیگار چکیردیلر.

اصغر پیلله‌لری دوشوب یانلارینا گئتدی.

«سلاااااااااام  شرکتیمیزین گول مهندس‌لری»

اوچوده بیردن اصغرین سالامین آلیب پیچی-پیچی دانیشماق‌لارینی کسمه‌دیلر.

اصغر ایسه اونلارین سؤزونه آتیلیب دئدی:

«تازا نفری گؤروبسوز؟ آدی دا رجب دیر»

ابراهیم یوغون سسله دئدی:

«هارا گلیب؟»

«چوخ اوزلو بشردی. گلیب آمبارا. من زنگ ائله‌دیم اورا، منه کلاس آچدی. بیر آی کئچسه نمنه اولار، وای وای وای»

کاظم سیگارین توستوسون اصغره ساری پوفله‌یرکن دئدی:

«نه انتظارین وار سنین. طرف گؤر کیمین آدامی‌دی. بللی دی بویونو یوغون پارتیسی وار دونن بیر بو گون ایکی گلیب سوخولوب آمبارا...اؤزوده یئکه- یئکه دانیشیر»

اصغر بو سؤزلرله یئنی بیر جان تاپیب اوره‌یی دئشیلدی:

«سنین آغزیوا قوربان اولوم. آی دئدین. بو گون صاباحدی دئیرلر اولوب رئیس حتمن»

هادی ایسه هئچ نه دئمه‌ییب ساده‌جه اونلارا قولاق آسیردی.

اوزاقدان مهندس‌لیک دایره‌سینین مدیرینین گؤرن هادی أمکداشلارینی خبردار ائدیب دایره‌لرینه دؤندولر. اصغر ایسه آمبارا ساری یوللاندی. قاپی قاباغیندا ائشییی بوسان احمد، اصغری گؤره‌رک آمبارداکی دئییب گولمه‌یی پوزدو. هرکیمسه اؤز ایشینه دؤندو، جاواد ایسه بیلگی‌سایارلا مشغول اولدو.

اصغر آمباردان ایچری کئچیب بیرباشا آمبارین دفترینه گیردی. قاش-قاباغی یئرله گئده‌رک مبل‌دا اوتوردو.

جاواد گولر اوزله مبل‌ا جوموب سیسقا گؤرونن اصغره ساری باخیب دئدی:

«به‌به اصغر آغا، خوش گلمیسن... صفا گتیرمیسن... دئیردین تویوقدان، خوروزدان، هیندیشقادان زاددان قوربان کسردیک»

اصغر ایچی-ایچی‌نی یئسه‌ده دئدی:

«نه خوش گلمه‌سی‌دی... نه صفاسی... او کیم‌دی گلیب آمبارا... آدی دا رجبدی...»

جاواد جاواب وئردی:

«دا نه ائیله‌مک... مهندس گؤزلی‌نین آدامی‌دی» سونرا تؤکدویو چایی خورولتو ایله ایشمه‌یه باشلادی.

«اولسون... هرکیم‌دی... نه تربیه، نه ادب... دئییرم آغا جاواد هانی... اوزلو- اوزلو دئییر:

جاواد گئدیب حاماما... یووونا اولا شاماما»

جاواد بو سؤزو ائشیدرک پوسگوروب چایی اصغرین اوستو باشینا سه‌په‌له‌دی... ائله اورک‌دن گولوردو، اصغرین نه‌قدر حیرصله‌نمه‌سینی گؤرموردو. جاواد پیچاق وورسایدین خبری اولماز ایدی.

«گولرسن به... گول... سنین کیمی ایکی اوزلولر بئله آداملارین بورا گلمه‌سینه باعث اولور... مسئول یانیندا بیر سؤز دئییرسن اونون آرخاسیندا دا آیری جور دانیشیرسان...»

«اصغر قارداش او نه سؤزدو...»

«مندن ائشیتسن اونا توبیخ وور... او کیم اولا منی اله سالا... کلاس آچا»

هله ده ایچینده گولن جاواد، اصغرین سؤزلرینی سایمایاراق دئدی:

«گؤرک نجور اولور... هله بو آدام ایکی گوندو گلیب توبیخ وورمازلار کی»

اصغر گؤزلرینی برلدیب جاوادین گؤزلرینه سالدی. جاواد ایسه بیر آن دا اولسا گولمه‌یینی کسیب جدی سسله دئدی:

«ایندی گئدیب دال آمبارا... گلسین دانیشارام... دده‌سینی یاندیراجاغام...»

سونرا اصغر، قوجا آروادلارین گلین الیندن عصبله‌نن زامان دئییندییی کیمی دئیینمه‌یه باشلادی:

«بیز تازا گلنده بیر حؤرمت- ادب وار ایدی... ایندی هر یئریندن دوران گلیر بو شرکته اؤزوده بؤیوک- کیچیک ده بیلمیر...سفئح کؤپئی اوغلو منه دئییر جاواد گئدیب حاماما...»

«اولسون سن داریخما... دور گئت ایشینه... من یولونا سالارام، دئیرم گلر سنه دئیر پوخ یئییبدی»

اصغر حیرصلی- حیرصلی اورادان آیریلیب آمباردان چیخدی.

اونون ائشییه چیخماغی ایله آمباردا ایشله‌ین‌لرین جاوادین تاختادان اولان بالاجا اوتاغینا دولوب قاهقاهالاری ایله آمباری پارتلاتمالاری بیر اولدو.

اصغر او گون ایش واختینا کیمی اؤزون یئییب، یئتیشنه گیلئیله‌ندی.

فابریکادان چیخاندا گئدیب مینی‌بوس دا، همیشه‌کی یئرینده اوتوردو. سون صندلی ده پنجره قیراغیندا. سونرا یانینا میرت باغیر گلیب اوتوردو.

«اصغر کئفین کؤک دئییل... نه اولوب؟»

«هئچ دئمه... اوره‌ییم دولودور... بیلمیرم نه زامانا کیمی بو شرکته هر جور آدامی سوخاجاقلار... آمبارا تازا بیر نفر گلیب، آدی دا رجب دی، صوبح زنگ ائله میشم جاوادی ایسته ییرم دئییر: گئدیب حاماما- یوونا اولا شاماما... منی اله سالیب، انگه آتیر.»

«اصغر اؤتور بو سؤزلری... آخشام گل گئدک بیزیم باغا اورادا بیرآز اوزوم در آپار، همده حوصله‌ن آچیلسین... سن اؤز ایشینده اول... دونیا هئچ کیمه وفا قیلماییب آی قارداش...»

سونرا اصغره جاواب وئرمه‌دن دئدی:

«آی کیشی سن دئییرسن بلکه هامی امتحان ایله ساواد ایله گلیب بورادا ایشله‌یه؟ هامینین بیر آدامی وار. بئله بیر سؤز وار دئیرلر؛ آدامی، تانیشی اولان یئرده قورد سئسین.»

«هه دوز دئییرسن...»

سونرادا هرکس اؤز دوراغینا چاتانادک سسیزجه پنجره دن منظره‌لره باخدی.

اصغر ائوده ده شرکتده‌کی حادثه‌نی اونوتماییب باشیندا آروادینا ماجرانی تعریف له دی:

«بو گون شرکته تازا بیر ایشچی گلیب، اسگیک آدام منی اله سالمیشدی...»

آرواد سؤزونو کسه‌رک دئدی:

«اصغر یئنه باشلادین... اؤتور او سؤزلری... ناهارینی یئ، دور گئدک تازا بیر پرده به‌یه‌نمیشم اونو آلاق.

اصغر ایسه سسین چیخارتماییب سس‌سیزجه چؤره‌یین یئییب، اوتاغینا گئدیب آخشاما کیمی یاتدی.

شام واختی آروادین سسی ایله اویانیب یئنه چؤره‌یین یئییب اوتاغینا دؤندو. گئجه‌نی کابوس‌لارلا صوبحه باغلادی.

صوبح آیاغی فابریکایا چاتاراق تئز آمبارا گئتدی. آمبارین ایشچی‌لری پالتار ده‌ییشمه یئرینده پالتارلارین ده‌ییشیردیلر.

سسین باشینا آتیب چیغیردی:

«هانی او رجب...»

جاواد یاخینا گلیب دئدی:

«هانسی رجب؟»

«همن منی اله سالان؟»

جاواد هئچ فکری باشیندا دئییلدی. بیر آن هرنه یادینا دوشوب اؤزونو ییغیشدیریب سویوق قانلیلیق لا دئدی:

«اصغر آغا اونو دونن رد ائله‌دیم گئتدی. سن دئین کیمی ایشله‌ین آداما اوخشامیردی. ایندی گئت راحات ایشینی باشلا.»

اصغر سس‌سیزجه آمباردان چیخدی.

گونش یاواشجا اورمو گؤلوندن کئچیب، علی پنجه‌سی داغین‌دان دیرماشیب شهری ایشیقلاندیرماغا باشلامیشدی.



یازی تورو : اؤیكو (حیكایه) 

گؤندر - کلوب‌دات‌کام
باخیشلار() 
بهمن
1394/01/21 01:08
سلاملار
بیر اجتماعی شعریله دعوتسیز
نقلریزی گوزلورم
جاواب admin :
keloglan
1394/01/7 20:03
واحدی جنابلاری سالاملار. بایراموزموبارک اولسون. گلیشیزدن ممنونام قارداش

جاواب admin :
خزراوغلو
1394/01/1 09:18

بایرامیز یئنی گونلریز موتلو اولسون. باشیز اوجا قالسین.
یئنی اوغورلار سیزه و باشقا دیلداشلارا آرزولاییرام.
جاواب admin : سلاملار
یئنی ایلینیز مبارک اولسون عزیز یولداش
deniz
1393/12/29 22:25
سیزه چوخ عزیز و دیرلی اولان نوروز بایرامین تبریک ائدیرم . سیزه جان ساغلیغی ، سوفره نیزین بول و برکتلی اولماسین آرزو ائدیرم ، قوی بوتون آرزولارینیز یئرینه یتشسین ، نوروز بایرامینیزی تبریک ایدیرم !!
جاواب admin : سلاملار
بو گؤزل بایرام سیزه ده مبارک اولسون
كل اوغلان
1393/12/27 23:33
قاباقجادان یئنی ایلی سیزه تبریك دئییب و سیزین ایچین و عائیله نیزایچین یئنی ایلده جان ساغلیغی آروز ائدیرمحدی جنابلاری گوزل دی. اللروار
جاواب admin : سلاملار
یئنی ایلینیز مبارک اولسون انشاالله. گلن گونلرینیز خئیرلی برکتلی اولسون
خزراوغلو
1393/12/27 13:36
چاشه‌مبه گونوز موتلو اولسون.
گلن بایرامیز یئنی گونلریز موتلو اولسون. باشیز اوجا قالسین.
یئنی اوغورلار سیزه و باشقا دیلداشلارا آرزولاییرام.
گرگرلی آراز
1393/12/26 10:44
سلاملار حوسین واحدی جنابلاری

دییه للر :قدیم زامانلار او آلتی گون- آلتی آی ایلین اوولی -زاماندا ن حساب اولمازیمیش ایلین آخیرینده بش گونون بوتون میللت بایرام ائدردی او بیر گونوده شاهلارین بایرامیدی اوندان سونرا زامانی ایشه سالیب گونلر سایلاردی !!
بو گوزل بایرام هاوالاریندا سیزه -عائله نیزه جان سالیقی اوزون عمور دیله یرم سیزه او شاهلار گونونده بایرامی تبریکلر دئییرم.
جاواب admin : سلاملار چوخ عزیز و حؤرمتلی گرگرلی آراز جنابلاری. بو گؤزل گونلرده سیزه و حؤرمتلی عائله‌نیزه جان ساغلیغی و دوشرلی لحظه لر آرزولاییرام.
سولدوزلو
1393/12/26 00:21
سلام
چوخ گوزل ایدی اما ای کاش آدلار دا تورکو اولسایدی.
deniz
1393/12/23 21:37
سلام واحئدی بی
گوزل یازی یارادیبسیز ساغولون
جاواب admin : سلاملار
یئری گلدیکجه تورکجه آدلار دا ایشله‌نیر. دقت‌ینیز اوچون چوخ ساغ اولون.
بهمرام
1393/12/23 11:29
سلاملار اولسون وطن داش تورکلریمیزه
بیر ینگی تورک شعری لن اوز وبلاگومدا سیزین یولوزو گوزلییرم
سیزین یوروملاروز و نقدلریز منی تورک ادبیاتو یولوندا یاردوم و کمک اولاجاخ
انشا اله گلین
باش وورون
خوشگلمیسیز
جاواب admin :
سلاملار و سایقیلار
arknaz
1393/12/9 16:22
حیکایه نی اوخودوم. گونوموزده چوخوموزون یاشادئغی قونولارا بو حیکایه ده چوخ گوزل یر وریبسیز.فقط من بیر شیی آنلامادئم.بو رجب آد وریغیز آدام. کی پارتنان ایش اوستونه گلمیشدی نجور او راحتدیخده ایشدن قوولودو... یوخو آدبلا یازدیغیز حیکایه نی بایرام درگیسینده اوخودوم. بو حیکایه لرده بیر جور سیرر وار ،اینسان حیکاینین باشلئغئن گوروو فیکرینه بیر شی لر گلیر اما حیکایه نی اوخویاندان سورا باشکا بیر تصویر ذهنده یارانئر وسواللارلا دولور.
جاواب admin : سلام دقتینیز اوچون چوخ ساغ اولون. رجب یوخ ایدی. همکاری یالاندان دءمیشدی.
گرگرلی آراز
1393/12/6 17:07
سلاملار واحدی جنابلاری
همیشه یازیلاریندا بیر تزه لیک وار اوخویانا لذت وئریر
جاواب admin : سلاملار عزیز قارداش چوخ چوخ ساغ اولون
حامید مورسلی
1393/11/27 22:48
چوخ ساغ اول قارداش دوغرودان لذت آلدیم. قلمینه ساغلیق.
جاواب admin : یاشا قارداش. واخت قویوب اوخودوغون اوچون تشککورا ئدیرم.
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.


Related Posts Plugin for WordPress, Blogger...