تبلیغات
◄███▓▒░░ -[ Xatirələr durağı ]- ░░▒▓███► - دیالوق | ژاله اسماعیل Dialoq - Jalə İsmayıl

خاطیره‌لر دوراغی (حیکایه‌لر)، حسین واحدی‌نین اؤزل بلوقو Hüseyn vahidi-nin özəl bloqu - Hekayələr

دیالوق | ژاله اسماعیل Dialoq - Jalə İsmayıl

یازار yazar :admin
تاریخ:1393/06/22-10:11

دیالوق / ژاله اسماعیل


کؤچورن:‌ حسین واحدی



1- بورا باخ، نه مسئله‌دیر بو؟ من هر گون سنی گؤرمک ایسته‌ییرم. بئزدیم دای.

- گلیب کئچر دردین آلیم، دردین آلیم…

- مزه‌لنمه ده، آغزیمدا سؤز دانیشیرام.

- زهله‌می تؤکمه. من نه بیلیم نییه گؤرمک ایستیه‌یرسن منی.

- بس دئییردین من هر شئیی بیلیرم.

- نه واخت‌دان منه اینانان چیخمیسان؟

- دئ گؤروم، من نئینه‌یم ایندی؟

- چوخ قورخولو شئیدی کی، بونو ایستمک؟ گؤرمک ایسته‌ییرسن، گؤر ده.
- منیم او قدر دردیم-سریم وار بو دقیقه. ائو صاحبی کسیب باشیمین اوستونو، دای به‌یه‌نمیر منی، دئییر، چیخ ائویم‌دن. مودیرله ده دولانمیرام، قووا‌جاق موطلق. آنام دا اؤولادلیق‌دان چیخارماق ایسته‌ییر هله، 5 آیدی رایونا[ولایته] گئتمیرم. بیر بابات شالواریم واردی، اونو دا دونن یاندیردیم اوتویله. بو وورچاتلاسیندا هله بیر سنی ده گؤرمک ایسته‌ییرم. دردیمه باخ منیم.

- ایندی یاخشی، من نئینیم؟

- سن بئله ائله. ائله ائله کی، سنی گؤرمک ایسته‌مه‌ییم.

- خسته‌سن؟ نئجه ائله‌ییم کی، بونو؟ آخیرینجی دفعه موردشیریوموش اوزونو 2 آی قاباق گؤرموشم.

- ائله من ده 2 آیدیر هر گون سنی گؤرمک ایسته‌ییرم.

- لعنت شیطانا. جهنم اول، ایشیم-گوجوم وار.

- آززار ائله. بس کیمه دئییم دردیمی؟

- قویویا.

- قورتار دا.

- آغلیما بیر شئی گلیر.

- دئ، گلسین.

- آما قورخما.

- یاخشی.

- هممم، بلکه وورولموسان منه؟

- نههه؟؟

- هه ده.

- آغزینا گله‌نی دانیشما.

- جهنم اول اوندا. منیم باشقا واریانتیم[سئچه‌نه‌ییم] یوخدو.

- وورولماق ائ. سنی 20 ایلدیر تانیییرام، نولدو ائله ایندی وورولاسی اولدوم؟

- نه بیلیم. سنده نه واخت چاتیب کی؟

- …یاخشی، توتاق کی، سنه وورولموشام. سونرا؟

- سونرا؟ سونرا دا سئوه‌جکسن.

- ساخلا! اونو یوخوندا گؤررسن!

- اؤزون بیل.

- …یاخشیی، توتاق کی، سئودیم، قولاق‌لارا قورغوشون، بس سونرا؟

- نه سونرا؟ سئودیگینله ده گرک ائولنه‌سن، یوخسا خوشبخت اولمازسان.

- نه؟؟ سنله؟ دلی ائله‌مک ایسته‌ییرسن منی؟ هاوالانیم دئییرسن؟

- قیشقیرما، قولاغیم باتدی.

- سنله نئجه ائولنه بیلرم کی؟

- آدام کیمی.

- یوووخ، آخیریما چیخا‌جاقسان سن.

-

- نیه سوسدون؟

-

- سنینله‌یم.

-

- کوسدون؟

- یوخ. بیلیرسن کی، کوسممیرم.

- یاخشی. ایشدن نه واخت چیخیرسان؟

- 6-دا.

- گله‌جم سنی گؤرمه‌یه. بیر شئی فیکیرلشریک بیر یئرده.

- سنجه، گئج دئییل؟

- نه؟

- بیر شئی فیکیرلشمک.

- نییه؟

- نه بیلیم… گؤرمک ایستیین‌دن ضعیف گؤرونورسن نسه…

- منه ایراده‌سیز دئمک ایسته‌ییرسن؟

- یوخ، اشی، بونو سنه نئجه دئیه بیلرم؟ 2 آیدی تکباشینا موباریزه آپاریرسان.

- سن مزه‌لن.

- بورا باخ، منی یوخودا دا گؤردوگونو دئمه. ایش بو حده چاتیبسا، باتمیسان آرتیق شاماخی باتان کیمی.

- هههه، هئچ یادیما دوشمور. بیر گون‌دن بیر یوخوما دا گیریرسن.

- دئییرم ده، گئجدی.

- ایندی نولا‌جاق؟

- بیلمیرم.

- گرک بیر شئی فیکیرلشم اؤزوم. سن‌دن کؤمک ائله‌ین اولماز.

- فیکیرلش ده.

- یوخ ائ، یانیب-تؤکولورم. 20 ایلدیر تانیدیغیم آداما نییه ایندی وورولما‌لییام کی؟ اؤزو ده من ساریشین‌لاری سئویرم.

- سئو ده.

- یاندیق وئرمه منه.

- بس کیمه وئریم؟

- الیمه دوش، گؤررسن گونونو.

- پاه، قورخدوم.

- قارغیشا گلمیشم واللاه. سن دور، دور، آخیردا بونا وورول.

- نولار کی؟

- درد اولار جانینا.

- اؤزجه جانینا.

- یوووخ، سن تمیز مزه‌لنیرسن منیمله.

- هه.

- …آخی نییه ایندی ائ؟

- هر گون گؤردوگون آدامی ساده‌جه گون‌لرین بیر گونو گؤرمک مومکون‌دور ده.

- ائله ده اولور؟ قفیل‌دن خادیمه‌میز قنداب آروادی دا گؤره بیلرم ده، هه؟

- اولا بیلر.

- اوففف…

- اوفولداما.

- ایندی چیچه‌یین چیرتلاییب.

- بس نئجه؟ سنین کیمی عقل‌لی-کمال‌لی بیر اوغلان وورولوب منه.

- لاغ ائلمه.

- یاخشی، سن گئت بیر شئی فیکیرلش، منیم ایشیم تؤکولدو قالدی.

- جهنم اول گئت… آخشام گلنده گول آلیم سنه؟

- آللاه، سن ساخلا! 20 ایلده سن‌دن گول گؤرمه‌میشم من. ایندی نولوب کی؟

- نه بیلیم…نسه ائله آلماق ایسته‌دیم…

- الده گول توتماغی سئومزدین…

- هئچ ایندی ده سئومیرم. خاصیت دییشه‌سی دئییلم بون‌دان سونرا دا. آما نسه آلماق کئچدی اورییم‌دن.

- اوریی‌نین سسینی دینله… لاپ یئرینه دوشدو. دسته باغلات، آد گونونه گئدیرم آخشام.

- منیم سنه آلدیغیم گولو باشقاسینا وئررسن، اللرینی قیرارام!

- اشی، سنه نه وار ائ. منه وئردین، بیتدی، اولدو منیم، سونراسینی اؤزوم بیلرم.

- ایندی گؤررسن.

- سنین خاصیتین نه توند ایمیش. 20 ایلده تانیمامیشام من.

- گولمه دئدیم.

- یاخشی.

- …گؤر نه گونه قالمیشام ائ. سسینی ده ائشیتمک ایستییرم.

- دای بسدی ده. اؤلدوم بورادا گولمک‌دن.

- دوغرودان دئییرم.

- بس نه یاخشی زنگ ائله‌میرسن ائشیتمک اوچون؟

- اصلینده سسین خوشوما گلمیر، چوخ جینگیلتی‌لیدی، قولاغیمی دئشیر. آما دیکتافوندا[MP3 اوخودان] یاخشی چیخیر.

- نه دیکتافون؟

- آد گونومده سسینی یازمیشدیم ائ تزه تئلئفونا، تبریک ائدیردین منی.

- هه…

- اونو ساخلاییرام دا. ائشیتمک ایسته‌ینده اونا قولاق آسیرام.

- یوخ، اوغلان، سونون چاتیب.

- گولمه.

- یاخشی. اوندا گؤرمک ایسته‌ینده ده تئلئفونلا چکدیگین شکیل‌لره باخیرسان.

- یووخ، تاپمادین. اورادا بورنون لاپ یئکه دوشوب. مکتب[مدرسه] شکیل‌لریمیزه باخیرام. او واخت یئنه آداما اوخشاییردین.

- او شکیل‌لر دورور سنده؟

- بس نه. کومپا[بیلگی‌سایارا] یوکله‌میشم. آیریجا قوولوقدادی.

-…

- نولدو؟

- منده ده.

- او گون بیر آخماق ایش ده گلیب باشیما. قفیل‌دن گئجه یوخودان اویاندیم، هاوام چاتمیردی، ایچیم آغیرلاشمیشدی، بو دم ائله بیل کیمسه قولاغیما پیچیلدادی کی، سن‌دن عزیز آدام یوخدو منه بو بویدا شهرده…

- …بس نئیلدین؟

- سؤیدوم سنی. داها دوغروسو، بابان مممدی[محمدی].

- اونو نییه؟

- گلیب بیزیم کنده چیخدیغینا گؤره.

- دئیه‌سن، یادین‌دان چیخیب کی، سنین بابان منیم بابام‌دان سونرا گلیب او کنده.

- اولسون. یئنه ده سؤیدوم.

- سؤین‌دن سونرا دای قولاغینا پیچیلتی سسی گلمه‌دی؟

- هارادایدی منده او بخت؟ سحره‌جن او سسین الین‌دن یاتا بیلممیشم. ائله بیل آغجاقاناددی قولاغیمین دیبینده.

- ووروب اؤلدوریدین.

- سنده ده چاتمیر ها. سسی نئجه اؤلدورمک اولار؟

- هه، مومکون دئییل.

- اوزاتما، ایشده بیر آز لنگی، گلیم سنی گؤروم، گئدیم. ایشیم-گوجوم وار.

- تئز اول اوندا. آد گونونه گئده‌جم.

- یاخشی. نه رنگده گول آلیم؟

- من هانسی رنگی سئویرم؟

- نه بیلیم؟

- بس نه اؤزونو اؤلدورورسن کی، 20 ایلدیر تانیییرام سنی؟

- نه بیلیم ائ…

- آللاه بابا دا بونو سنه باغیشلامادی دا. زورلا یادینا سالدی منی.

- یقین.

- اؤز ذؤوقونه اویغون بیر شئی آل.

- یاخشی.

- تئز گل.

- یاخشی. آما سن ده بیر شئی فیکیرلش ده، قوربان اولوم. نئجه ائله‌ییم کی، سنی گؤرمک ایسته‌مه‌ییم. من ایستمیرم سنی گؤرمک ایسته‌ییم، یوخوما گله‌سن، سسینی دینله‌ییم. ایشیم-گوجوم وار منیم، قادان آلیم، بیر شئی فیکیرلش ده.

- گؤروم ده.

- همیشه کؤمک ائله‌میسن منه. ایندی ده داردا قویما. سن‌دن باشقا کیمیم وار آخی؟

- سؤز وئرمیرم. غلیظ مسئله‌دیر.

- بیر دنه‌سن. سنه قیزیل‌گول دسته‌سی باغلات‌دیراجام، آد گونونده هامی‌نین خوشو گله‌جک. سن ده بیر شئی فیکیرلش.

- یاخشی.

- دایان، گؤر نه دئییرم. منی اؤز یئرینه قوی. منی گؤرممک اوچون نئیلیردین؟

- بیلمیرم.

- بیلیرسن.

- بیلمیرم. مومکون‌سوز شئی‌لری تصور ائله‌مک چتیندی منه.

- یاخشی دا. هر شئیی بیلیرسن سن. بلکه ده بیر گون سنه وورولاجاغیمی دا بیلیردین.

- …هه، بیلیردیم.

- هارا‌دان بیلیردین؟

- چوخ ساده. بو یاد شهرده من‌دن عزیز کیمین وار کی؟

- هئچ کیمیم.

- بوتون دوستارینا، تانیش‌لارینا، قیزلارینا دیرم، آرتیغیم دا قالار.

- قالار.

- اوریین سن‌دن عاغیللیدی آخی، او دا سئچیب.

- کول اونون باشینا. 6-جی مرتبه‌دکی گؤزل ساریشینی نییه گؤرمور آخی؟

- چونکی، ساریشین اونو گؤرمور. من او ساریشین‌دان عزیزم او اوره‌یه.

- نیه؟

- بو ایشین نییه‌سی اولمور کی. سئوگی ایضاح اولوندوغو یئرده بیتیر…

- خاطیره دفتری یازمیرسان، یئنه باشلاما.

- من یازدیم قورتاردیم، بون‌دان سونرا سن یازا‌جاقسان.

- اونو گؤرمزسن. بو، آخیرینجی دفعه اولسون. بیر ده سنی گؤرمک ایستمه‌یه‌جم!

- باخ دا.

- موطلق!

- اولسون.

- …بیلیرسن هله نئیله‌میشم؟

- نئیله‌میسن؟

- قولاق آس. عمل‌لی-باش‌لی گیجییمیشم من، خبریم یوخ…

- من بیلیردیم…

- مزلنمه ده. دئمک، بو گون ایندییه قدر منه باغیشلادیغین بوتون هدیه‌لری اورا‌دان-بورا‌دان تاپیب ییغمیشام ماسامین اوستونه…ائله قشنگدی‌لر کی…

- اونلاری ساخلاییرمیشسان؟؟

- تصور ائدیرسن؟ نییه‌سینی بیلمیرم، سوروشما.

- …یاخشی، چوخ لنگیمه، گئدن یئریم وار.

- اولدو. منه باخ، من نیه هیجان‌لانیرام آخی بئله؟

- سنده همیشه چاتماییب…

- …دوغرودان دئییرم، اورییم اسیر لاپ…آلتی-اوستو سنی گؤره‌جم ده…

- نه بیلیم…

- یاخشی، 6-دا اوردایام، قوی، مودیر اؤزونو اؤلدورسون لاپ.

- گؤزله‌یه‌جم.

- سئوینمه. بو آخیرینجی دفعه‌دی.

- نه دئدیم کی؟ اولسون آخیرینجی دفعه.

- یاخشی، ساغ اول، قیزلارینیزا دئمه ها بو باره‌ده. گولرلر منه.

- یاخشی.

- اؤزون ده تئز چیخما ایشدن.

- دای گئت ده. واختیمی آلیرسان.

- …لعنت شیطانا، سنینله دانیشماق ایسته‌ییرم آخی…

- اوففف…

- جهنم اول. هئچ گلمیرم.

- گلمه.

- گؤزله منی.

- گؤزله‌یه‌جم.

- آما باغیشلا، کؤینه‌ییم اوتوسوزدو.

- اولسون. نه واخت اوتولو اولور کی، او کؤینک؟

- هله‌لیک…

- هله‌لیک…

- ائله سؤز دئ کی، رد اولوم گئدیم ده!

- دود-دود-دود…

- جهنمه قولاق آس! اساس شئیی دئمه‌دیم آخی. من 20 ایلدی سنی سئومک ایسته‌میرم…ائشیدیرسن…؟


یازی تورو : اؤیكو (حیكایه) 

گؤندر - کلوب‌دات‌کام
یوروم یاز ... Yorum yaz() 
Jalə İsmayıl
1393/07/25 23:01
Təşəkkür edirəm, Hüseyn bəy diqqətiniz üçün. Şərh yazan oxuculara da vaxt ayırdıqları üçün təşəkkür edirəm. Var olun.
جاواب admin : Salamlar əziz Halə xanım
sizi çox xoş gördük
gözəl yazınız üçün təşəkkürlər
زهرا بادره
1393/07/3 20:13
سلاملار و سایغیلار واحیدی جنابلاری
گوزل و ده یرلی چئویرمه نیزی اوخودوم اللرینیز آغریماسین
قلمینیز بونداندا آرتیق گوجلو و ایشیق اولسون
درین حورمتله
باغیشلایین بوندان قاباق کی کامنت ائله بیل خاراب اولدو
من تئزه دن یازدیم اونو سیلین اللرینیز آغریماسین
جاواب admin : سلاملار چوخ عزیز و حؤرمتلی قلمداشیم خانیم زهرا بادره. حضورونوزدان ممنون اولودوم.
زهرا
1393/07/1 19:27

وبلاگیما دعوتسیز
جاواب admin :
deniz/zanjan
1393/06/28 10:34
نه قدر یالواردی !!!

ساغولون چوخ گوزل یازیدی تشککورلر سیزدن
جاواب admin : سلاملار. چوخ ساغ اولون
تسنیم
1393/06/27 23:58


بِ سانِ آن لیوان شکسته میمانم



آگاه باش کِ



اگر بخواهی تشنگی ات را با من برطرف کنی



شک نکن لَب هایت را خواهم دَرید


جاواب admin :
تبریز ویکی لینکلر
1393/06/22 16:19
سلام
چؤخ ظرافتلی و اؤرییمه یاتان یازی..
تشکور یاشا...
http://tabrizlinks.mihanblog.com/
جاواب admin : سلام/ سیزه ساغ اولون عزیز قارداش
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.


Related Posts Plugin for WordPress, Blogger...