تبلیغات
◄███▓▒░░ -[ Xatirələr durağı ]- ░░▒▓███► - اؤزگورلوگون دادی Özgürlüyün dadı (حیکایه)

خاطیره‌لر دوراغی (حیکایه‌لر)، حسین واحدی‌نین اؤزل بلوقو Hüseyn vahidi-nin özəl bloqu - Hekayələr

اؤزگورلوگون دادی Özgürlüyün dadı (حیکایه)

یازار yazar :admin
تاریخ:1392/12/23-21:15

اؤزگورلوگون دادی

یازان: حسین واحدی


«توتون , توتون» دئیه, اووچولار آرخامجا قاچیردیلار. اوره‌گیم ثانیه‌لره ماجال وئرمه‌ییردی. کؤپک‌لر ایسه منی توتوب صاحیب‌لرینین یانین‌دا باش اوجا اولالار دئیه, دؤرد آیاق دا، بورج آلیب, یئیینجه قاچیردیلار. آیاق‌لاریمین گوجو تؤکنمیشدی. یازیق کؤپک لره اوره‌ییم یانیردی. هئچ زاد الده ائده بیلمه‌یه‌جک‌دیرلر، آنجاق, بیر سوچ‌سوزو توتوب, یییه‌لرینه وئرمه‌کدن سونرا هئچ نه‌یی دوشمونمه‌ییردیلر. او یازیق‌لار یالنیز یییه‌لرینه قوللوق ائتمک اوچون یارانیب لاری, سانماق اولوردو. اووچولار ایسه اونلاری قیزیشدیرماق اوچون, چئشیدلی سس‌لر چیخاریدیلار. سون نفسیمه‌دک, آیاقلاریما زور وئریب, آددیم‌لاریمی بؤیوک گؤتوروب بوروق وئره- وئره قاچیردیم. بیر آن, آیاغیم بیر آغاجا ایلیشیب باشی اوسته یئره دوشدوم.

باشیمی دیک توتانا زیل قارا گؤزلری ایله منه باخان کؤپه‌گی باشیم اوسته گؤردوم. باغریم چاتلاماق اوزره‌یدیر. جانیم بوغازیما تیخیلمیشدی. ال- آیاغیم اسیردی. گؤزلریمدن قورخو سوزوردو. کؤپه‌گین یانینا، یولداشلاریدا یئتیشمیشدیلر. آیاغیم گؤینه‌ییردی. قاپ-قارا کؤپک ایسه منی توتدوغونا سئوینیردی. بیر آیاغین قویروغومون اوستونه, او بیرین ایسه قارنیما قویموشدو. قلبیمین دؤیونمه‌سی, اؤز قولاغیمی کار ائدیردی. آنجاق کؤپک‌لر بونلاری آنلامایاراق, یالنیز منی توتوب, یییه‌لرینه وئرجه‌کلرینه دوشونوردولر. بیر آزدان اووچولار یانیما چاتدیلار. اووچولارین باشچی سی اوزون قولاق‌لاریمدان توتوب بوی- بوخونوما باخیب, اوو تورباسینا آتدی. باشیما نه گله‌جه‌ک ایدی، بیلمه‌ییرم. توربانین ایچینده‌کی دونیام چوخ قارانلیق ایدی! اؤزومو چوخ یالنیز حس ائتدیم. باشیم گیجه‌لیردی.

کؤپک‌لرین, هورومه‌له‌ریندن, سئوینجک اولدوقلاری بللی ایدی. اووچولار بیر آز یول گئتدیک‌دن سونرا, دینجلمک ایسته‌دیلر. توربانی بیر آغاج‌دان آسیب اوتراق ائتدیلر. قارنیم قورلداییردی. چوخ آجیقمیشدیم. آنجاق دؤزمک‌دن سونرا هئچ زاد ائده بیلمه‌ییردیم. اؤز-اؤزومه, «بونلارین الیندن قورتولسام, بیرده اووچولار اولان یئرلره آیاغیمی قویمارام» دئییردیم. اووچولارین اوتراغین‌دان  بیر آز کئچمه‌میش, یاغیشین قوخوسون آنلادیم. اوره‌گیمه اومود قوندو.

اووچولار اوجادان دئییب-گولوردولر. اونلارین بیری؛ «آی یولداشلار گونش باتان الدن قارا بولودلار بیزه سازی گلیر, دورون ییغیشیب گئدک»- دئدی. یولداشلاری ایسه آیاغا قالخیب گئتمک ایسته‌دیلر. او آن‌دا بیری توربایا ساری گلیب؛ «قوی باخیم گؤروم بو گؤزل دووشانین حالی نئجه‌دیر» دئییب, توربانی آغاجدان یئندیردی. توربانی یئره قویوب, ایپین آچماق ایسته دی. بوتون گوجومو, ائشیگه آتیلماق اوچون آیاق لاریما ییغدیم. ایپی آچیب, توربایا باخماق ایسته‌دیگینده, آنسیز توربادان آتیلیب, دؤنوب آرخاما باخمادان قاچدیم. اووچولار، ایت‌لری آچیب آرخاما یوللایینجا اللری چاتمایانا قه‌در اوزاقلاشدیم. اوره‌یییم یئریندن چیخماق ایسته‌ییردی. اؤزگورلوک نه‌دیر ایندی بیلمیشدیم. اوجا بیر تپه‌نین اوستونه چیخیب اوزاقدان اونلارا باخدیم. دالیمجا دوشمک‌دن واز کئچیب, یاغمایا باشلایان بولودلارین الیندن قاچماق ایسته‌ییردیلر. اؤزلرین تاپانا, قارا بولودلار, اؤزلرین‌ده اولان بوتون سولارینی یئره تؤکمه‌یه باشلادیلار. قاچماغا باشلادیلار, ایسلاق کؤپک‌لر ایسه آرخالارینا دوشدولر.

اؤزگورلوک گتیرن یاغمورون آلتیندا اونلار قارالاناجان گؤزلریمی بیله‌لرینه زیلله‌میشدیم. جوم-جولاق سو اولموشدوم. آنجاق اورکدن سئوینیب یاغیشی دوداقلاریما چاتدیقجا اؤپوردوم. باشیمی گؤیه ساری توتوب بیر داها اؤزگور اولدوغوما تانری یا شوکور ائدیب، گوله- گوله, « تانریم, اوزگورلوک نه گؤزل ایمیش» دئییب, بولودلار آرخاسیندا گیزلیجه منه باخان گونشه ساری، یولومو توتوب گئتدیم.      



یازی تورو : اؤیكو (حیكایه) 

گؤندر - کلوب‌دات‌کام
باخیشلار() 
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.


Related Posts Plugin for WordPress, Blogger...